Perchè u sangue ùn ci curria

 Una nuvella di Kévin Petroni


« Una scelta prufonda ammachjò u mondu assente »

Jacques Audiberti, Miroir.


À u Bataclan, u 13 di nuvembre, ci eranu di sicuru a paura è u dulore, è u silenziu di e cintunaie di l’offesi ; ci eranu di sicuru babbi è mamme, zitelli è maiò, chì piignianu d’altri babbi è d’altre mamme, d’altri zitelli è d’altri maiò ; ci eranu di sicuru cintunaie d’inghjuliati, cù e so bracce dichjangulate è e so anche smembrate è e so mani diccippullate chì ùn sapianu più pricurà a so sorte ; un zitellu, ci sarà statu un zitellu, un zitellu di sicuru, à chjamassi Nathanaël, è more tafunatu da a so palla, incrucifissatu d’odiu, incurunatu da ogni viulenza di u mondu, ma micca cum’è a dite voi, micca cum’è l’avete detta in u vostru scrittu perchè u sangue ùn ci curria.

 In u vostru scrittu, aghju lettu à Rimbaud è u so Sunnulone, San Ghjuvanni è e so angosce, u magnacone, l’orrende criatura chì pasce i timori ; ma ùn aghju vistu nulla di e stonde ch’e cunnoscu, quandu ci adduniamu in caffè è chì sapiamu ch’ellu ci vulia à chjavà e turiste chì passavanu a so vita à chjavà e nostre loche, e nostre mamme, e nostre surelle. Ùn aghju vistu nulla di a nostra cuntintezza quandu spuntava l’arma di punta à e so facciacce è ch’elli ci supplicavanu di chjappà i so soldi, di chjappalli tuttu, ma soprattuttu di lascialli a vita, per pietà d’ùn falli nulla, d’ùn amazzalli quandu ùn bramavamu cà quessa. Ùn aghju vistu nulla di stu mumentu à rimiracci l’arme in manu, noi, i cumbattanti di un vechju reame, noi, figlioli d’una storia ch’ùn si pò dì, noi, i boia sacrati d’una tarra sacrata, chì cumpiamu i miscridenti cum’è i nostri babbi nanzu à u nostru regnu. In u vostru scrittu, ùn aghju induvinatu st’addunite in ste sale cughjose di banlieue à maladisce un paese in manu à i feujs, à Israel è à l’America, stu paese d’infidi chì copranu, è zurlanu è festighjeghjanu cum’è mai elli, i figlioli d’Allah, ùn copraranu è ùn zurlaranu è ùn fistighjaranu di a so vita, stu paese di razza bianca nù qualessa ghjacenu è ùn pudaranu mai cà ghjace à mezi taghi, autostrade è pisciu. Ùn aghju cunnisciutu st’arma da manighjà in trà d’amichi, poi in trà di fratelli è purfine in trà di cumbattanti, di u segnu ch’omu mira, poi di l’animale ch’omu tocca è di u tippu ch’omu assassina, di l’appartamentu ch’omu rege, à a cità ch’omu supraneghja è à a regione ch’omu guverna. Ùn aghju cunnisciutu stu sintimu d’appartene à a luce è à u sottusopra di u mondu, à u so celente è à a so perdita, a so nascita è a so morte in una crisciuta è un scumpientu torna è torna à turnà.

Duve sò e voce di i boia ? Duve sò i so visi ? Ùn sò criature, bestie esciute da mondu in là, barbari à esse à a fine di a nucenza è à l’orlu di i crimini, sò i vostri fratelli, quì, à fiancu à voi, sò i vostri amichi, sò i vostri vicini chì anu decisu d’impone a lege di u so reame per salvà u vostru di u so fragicume. Invece d’Abraham chì avia dumandatu à Diu, Quellu chì hè a sola ghjustizia, s’ellu tumbaria cinquanta nucenti tale à culpevuli ; Invece d’Abraham chì cherse à Diu s’ellu salvaria a cità per quaranta ghjusti, chì cherse à Diu s’ellu salvaria a cità per trenta ghjusti, chì cherse à Diu s’ellu salvaria a cità per dece ghjusti ; invece d’Abraham, quellu chì, per amore, misse a cultella nant’à a canella di u so figliolu, dumandavamu à Diu s’è no pudiamu sacchighjà a cità per dece culpevuli, s’è no a pudiamu brusgià per vinti, s’è no a pudiamu strughje per cinquanta. È induve Diu ùn ne vide nucenti, induve Diu picciò focu à a cità, accittò u nostru ordine è a nostra caduta da celi in là.

St’ordine è sta caduta ch’è v’avete sminticatu, ch’è vo ùn avete forse mai campatu, eiu, l’aghju amparati da st’anni passati luntanu di a mio figliola è di a mio moglia, luntanu di a mio tarra è di a mio mamma, luntanu di a mio nucenza è cusì vicinu à a faccia di sta mullizza di turista supplichendu ch’e pianti, pietà ch’e pianti di calpighjalli i petti è a figura, di straccialli a so robba è e so mutende, d’infrugnà u mio ceppu in a so muzza è di tirà, tirà fin ch’ellu ùn fermi nulla di u so mughju, di a so risistenza è di a so vita. Aspessu aghju pinsatu à i so ochji ch’ùn fughjianu i mei è à a so bocca chì mi dicia site un porcu è nisun’casa, nisun’cità, nisun locu ch’è v’arrizzarete di e vostre mani ùn a si francarà di sta pistola ch’aghju trà e cosce, nulla di ciò ch’è vo farete, mancu u ciucciu ch’è vo farete nasce, ùn vi sciugliarà di stu gestu, manch’ellu ùn vi darà à scopre l’avvene è a cità impernata in u celu induve i scapati, e salme è l’impiccati d’arimane stanu in pompa sopra un mondu sanicciu ; manch’ellu ùn saparà salvalli di e fiare chì stirponu à Sodoma, ùn saparà francavvi di u focu chì aspetta i putenti è l’urgogliosi di stu tempu chì Diu ùn stà à sente a forza, tralascia i vincidori, ùn s’impreme di a vittoria ; è vi cundannarà à l’aghjumpata cum’ellu sà cundannà quelli chì parlanu per Ellu, saparà vede e mio ferite, leghje nant’à a mio carne a vostra grammatica boffa è a vi farà disamparà. Chì cusì hè a so parolla, a parolla chì u sguardu viotu è a bocca insanguinata di a vittima palesa sempre ; quelli chì sò stati alzati saranu aghjumpati è quelli chì sò stati aghjumpati saranu alzati. Mi ferma dunque à stammi zittu, à sminticà u mio nome è a mio cità, u mio visu è u mio passatu, à ùn divvi più nulla per a mio vita, in a sempiterna, quallà, chì mi porghje a so fuchera è a so ira eterna ; mi ferma à tendeli e bracce è à vultammi un’ ultima volta per dillavi : misfidatevi di ciò ch’è vo dite, misfidatevi di e vostre parolle è ùn vi scurdate d’unurà u sangue di quelli chì posanu à a manu dritta di Diu.

U magna bugiartule

Una nuvella di Marie Ferranti


Era sguasi miziornu. A calmana acciaccava tuttu. Arrimbatu à e petre ardente di u muraglione erbosu, Hugo cuttighjava e bugiartule. Ne sculinò una. U giuvanottu pruvò à piglialla, ma a bugiartula li scappò filendu tale una frezza, fece una arretta è si ficcò in qualchì creparella di a muraglia. Hugo ùn rinunciò. Chjappò una canna è n’appinzò a punta incù una cultella, fighjendu u tafunellu, appiccicò un ochju di punta à a crepa, fece un passu in daretu, decise d’aspittà. A zitelluccia u vardava. Hugo misse un ditu nant’à e so lapre è l’insignò a crepa. S’avvicinò, sburlendu l’ochji da vede megliu, è, Hugo rimarcò u so iride lucicante, simule à un celu sbiaditu. Pianu, scantò a zitelluccia. A punta di a canna era troppu larga ; a fece più fina. Sbulicò forte in u tafone : nulla vense. Si misse in cucculipì, sciolse unu di i so straglieri, fece un cappiu scursoghju. A zitelluccia si pindia da sopra à ellu. Fighjulava ognunu di i so gesti. Hugo pisò l’ochji ver di ella è li porse un surrisu. Liò u stragliere à a punta di a canna è assistò u so lacciu. 

A zitellucia cacciò un mandile da a so borsa è s’asciuvò a faccia.

 « Ai u caldu ? Voli beie ? »

Fece cennu di sì. Pigliò a zucca appesa à a so cinta, tirò u tappu è a li tense. A zitellucia si fece una beta è stupò l’acqua. 

« Andaremu à a surgente dopu, disse. L’acqua hè bella fresca. »

 Incicciò u mandile di a zitelluccia è l’allisciò a faccia cù u pannu umbule.

 « Statti appena à u frescu. »

S’incagnò sottu à u muru, ma vultò da ch’ella vide spuntà u so steccu è u cappiu scursoghju di punta à u tafone duve s’era ascosa a bugiartula.

Stavanu stantarati, fiancu à fiancu sottu à u sole. Hugo strignia i denti è mirava davanti. U sudore li spisciulava in faccia è i so ochji cinnulavanu. U so bracciu stinzatu era agrancatu è li sintia è a so manu trimulava. Chjuccò l’Ave Maria, cappiò. A zitelluccia ùn riminava un pelu. Quandu a ciccona piantò, Hugo si misse torna in posta. L’attesa ùn fù longa. U capu di a bugiartula affaccò in a cripatura. Hugo passò u cappiu è tirò seccu. A bugiartula, à u colpu allacciata, minava e cudate furiose. Hugo a ponse in pianu. Fece nice di pruminalla in punta à u filu. A zitelluccia si sbillicò. Chjappò à bugiartula in una manu, è, di l’altra, si pigliò l’indice di a zitelluccia furzendula à carrizzà u corpu biancu di a bugiartula.

« Hè dolce ! disse. Piglia a cultella in a mio stacca. »

 A zitelluccia ubeì. Hugo riponse a bugiartula nant’à una petra liscia è tinendula forte d’una manu, tagliò a coda chì cuntinivò à sbattulà. A zitelluccia si piattò a faccia cù e so mani.

« N’appia paura ! Ùn hè nulla ! Varda ! »

Hugo puntò cù u pede a coda di a bugiartula in a piobba. 

U capu di a bugiartula spuntava da u so pugnu strettu. Tale un vantu cusgitu, a pelle pichjulata di grisgiu, di neru è di verde accintulava u capu chjuculettu è pinzutu, chì di tantu in tantu si facia un’incisa. L’ochju neru è tondu era fissu è a penula pisia si calava pianu pianu. Hugo allisciò l’animalottu cù a punta’u ditu è u strufinò contru a so masca. Poi, capalzatu ver di u celu, tinendulu in punta à u so bracciu tesu, aprì a bocca è, u ficcò vivu trà i so denti. Fidighjò a zitelluccia. Ùn ansciò. Hugo piigò i dinochji, avvicinò u so visu di u soiu. Sintia u soffiu precipitosu di a zitelluccia in u so collu. S’arrizzò, si cacciò a bugiartula di bocca. À i so pedi, ci era una scatula di legnu cù un cuparchju picchittatu di tafoni. Ci sarrò a bugiartula è chjose u cuparchju.

  « N’aghju cinque avà ! disse. »

 A zitelluccia sciaccamanò. Quand’ella ridia, si vidianu i so dentucci lupini è a scrignata turchina di i so ochji di ghjattu.

Una voce ribumbò. Era a mamma d’Hugo chì chjamava.

 « Truvemuci quì dopu. Vinarè ? »

 A zitelluccia fidighjò ingiru è partì di corre.

 Hugo ricosse a scatula, a canna, a zucca è rientrò in casa.

 Passendu da u lume à u bughju in curridore fù suspresu. Li ci volse una stonda per accumudassi di a friscura adumbrata di a casa. Piattò a scatula sottu à a scala. Li garbava pocu à a so mamma ch’ellu arrechi ste bestiole è, s’ella si n’arvidia, e daria à l’urtulanu da ch’ellu si ne sbarazzi.

Muhammad u « bauab »

Una nuvella di Fabien Flori

« uarrèd, itnin, talattà, arbà, ramsà... », Francescu Luigi era pusatu nant’à u guidone di Muhammad è ripassava a so lezziò d’arabu mentre chì a bicicletta filava à strappà l’aria in u carrughju cummercente di « Sakanat-el-Maadi ». U ventu chì staffilava u so visu l’impedia d’apre l’ochji è, cum’è tutte e sere, Francescu Luigi si lasciava cunduce à a ceca à mezu à i carrughji di u Cairo, suladimente guidatu da i prufumi è e voce di a stretta. Ognitantu, Muhammad si piantava ind’è Tarek chì tinia una butteiuccia in Sakanat, cumprava duie cipolle è qualchì pumata, un pane di forma schjacciata è si pusava pocu tempu dopu nant’à e scale di a nostra casa per priparassi un spuntinu. Francescu-Luigi era incucculitu à cantu à ellu, u stava à sente è ùn avia chè risa in bocca.

  Cù a so mustaccia fina, Muhammad paria d'esse un cantadore palermitanu. Ghjera un omu sgualtru, intelligente è, ancu s’ellu era pocu struitu, avia amparatu da per ellu u francese, l’inglese è ancu qualchì parolla di talianu. Muhammad era u « bauab » di u nostru casamentu chì cuntava una vintina d’appartamenti è, ogni mese, i lucatarii li davanu qualchì soldu per assicurà a securità di l’edifiziu, pulisce e vitture, pagà e fatture o rende diversi servizii dumestichi ; ghjera quessa a missione d’un « bauab ». Cum’è a maiò parte di i so cungeneri, Muhammad stava à u pian’ di terra, solu, in una stanza senza finestra è senza acqua. Una volta à a settimana, ritruvava a so moglie è i so figlioli chì campavanu in a campagna di u delta di u Nilu. Pensu chì u fattu d’occupassi di Francescu Luigi li ramintava i soi è avia sviluppatu un affettu speziale per u nostru mascettu.

Ogni casamentu è di manera generale, ogni scornu di u Cairo, ancu u più piduchjosu, avia u so « bauab » ! Ind’è l’Egittu di u Presidente Mubarak, i « bauab » custituianu una reta di spie chì rinsignavanu a pulizza nant’à l’attività di a pupulazione. Muhammad ùn dirucava micca à a regula è era spessu interrugatu da l’armata nant’à tal’ lucatariu o tal’ visitadore. Sia cum’ella sia, Muhammad era diventatu un amicu, una persona ch’avia a nostra cunfidenza è chì s’occupava di u nostru figliolu cume s’ellu era statu di u so sangue.

Tutte e sere, Muhammad si mischiava à a sempiterna prucessiò di e vitture di lussu chì furmava una granitula è chì caminava in fila versu l'Irish School, una scola privata di u Cairo. A scola era friquentata da una maiurità di zitelli stranieri vinendu da un mezu suciale favurizatu. Ancu s’è l'atmusfera di 'ssa scola ci dispiacia appena, Francescu Luigi era scularizatu quallà.

Cum’è sempre, Dawn, a so camarata di ghjocu, dicia chì u so sciuffore avia da vene à circalla è Francescu Luigi li rispundia chì anch'ellu aspittava u soiu ; ma mentre chì un vitturone neru si cansava per Dawn, Francescu-Luigi, ellu, agguattava a venuta di Muhammad nant'à a so vechja bicicletta rughjinosa. Sott'à l'ochji invidiosi di l'astri zitelli, Muhammad u facia cullà nant'à u guidone, mettia u so saccu à collu è si n'andava per 'sse strette misteriose è affascinante. A lezziò d'arabu pudia cumincià ! « uarrèd, itnin, talattà, arbà, ramsà... », Muhammad serpighjava trà i carretti di i mercanti per fassi piazza in a calca, facia mottu à unu, ne liticava un antru. U fattu di rientre da a scola era sempre un' aventura.

Parechji anni si sò scorsi ma quandu Francescu-Luigi si ramenta 'sse stonde, li rivene sempre in bocca u gustu inzuccheratu di i prufumi di 'ssa tarra, u sintimu d'avè cundivisu u pane è l'oliu, a cuscenza d'avè in ellu stessu appena di 'ssa cultura egizziana millenaria.

I trè Dumenicu (3/3)

Una nuvella di Jean-Yves Acquaviva

Dumenicu addunì i so figlioli in u salottu, cacciò quattru pistole d'un cascione è tirò u cane d'ognunu. Ne spose trè nant'à u tavulone di noce à meza pezza è si tense u quartu. Avaria pussutu tumballi da per ellu, compie a so opara di a so manu. Vide in st'ultimu instante l'occasione d'una fine trabella, l'appogeu di st'arte novu ch'ellu avia invintatu è chì si n'andaria cun ellu. Offrendu à a pusterità a fiura magnificamente boffa d'un'alma sola lascendusi attempu quattru invillopi carnali oramai senza utilità. Cullarianu ver di u celu o s'affundarianu in infernu ùn avia impurtanza, sola cuntava a so eternità.

Li disse ch'era ora, chì ci vulia à suvitallu. Era sicuru ch'elli farianu ciò ch'elli facianu dapoi sempre, ch'elli accunsentarianu un'ultima volta d'un stessu abbriu à a so scimità. L'avia criati, i pudia strughje, megliu, decide ch'elli si strughjarianu da per elli. Pisò a so arma, si ficcò u cannone in bocca è tirò senza esitazione. I so figlioli fecinu ciò ch'ellu avia prufetizatu, adoprinu a stessa vuluntà. Li vultonu u spinu è andonu à passi lenti ver di u purtone chjosu nant'à u so mondu dapoi ch'elli esistianu. L'aprinu è videnu u turchinu di u celu, sentinu u trimulime di l'alburi sottu à a carezza di u trattu vesperale è a vita chì l'aspittava.

Dopu à avè frustatu parechje famiglie d'accolta eranu scalati ind'è una parintella di u so babbu. Una brava donna persa mezu à duie età, abbastanza umana per piglialli cun ella ma troppu niscentre per vedene l'uscurime. I ghjatti è i cani di u carrughju li bastonu un tempu. Sin'à u liceu quandu a Dumenicu femina capì chì l'omi a vardavanu. Unu di i primi à fallilu sente fù u so prufessore di lettare, isciutu da anni è anni da l'università, ma u core sempre pienu di a spiranza di tramandà u sapè ch'ellu ci avia acquistatu. U lasciò fà, attizzendulu ciò chì ci vulia da ch'ellu si scordi di e trave murale è deontologiche. Svilendu una spalla, scrignendu a so camisgia, li prumittia a so pelle nuda. Quandu l'omu ebbe compiu di calpighjà ognunu di i so pincipii è a ci fece à pruponeli un scontru più addattu à e carezze, rise è li dede un pezzu di carta. Adossu eranu scritti un'ora è l'addirizzu d'un parcu scantatu da u centru di a cità è chì nutria una mansa di fole urbane. Dapoi dui anni, omu ci avia trovu parechje salme sfragillate di colpi, culpite d'una viulenza sprupositata.

Una mez'ora nanzu l'ora cunvinuta l'omu piantò a so vittura vicinu à l'intrata. Francò u purtone di farru è si misse à pusà nant'à una panca da duve a vidaria ghjungne. Vulia gode di u spitaculu di sta giuvanotta viaghjendu à via d'ellu, mossa da a brama di culmà tutte e soie. À passu ligeru s'avvicinaria, mirendulu cù i so ochji ingordi di tuttu ciò ch'ellu l'avia da amparà. Saria u Pygmalion di u so piacè novu, spulendu senza contu a so scenza voluttuosa. Ùn avia micca da ghjucà i Humbert Humbert dendusi à l'abbagliulimi ninfuletti è innamurassi di sta Lolita di paccuttiglia. À quandu a so fame saziata, a lasciaria per chì d'astri, in d'altre loche è d'altri tempi, prufittinu di u fruttu di e so lizzione. Dopu à avè aspittatu un'ora, mentre ch'ellu s'arrizzava pinsendu chì purfine ùn avia più nulla à amparà di l'usi puttaneschi, ghjunse. A fidighjò, cum'è privista, lascendu u so visu vestesi d'un surrisu suddisfattu. A siconda dopu, ebbe l'impressione chì u so capu schiattava è cascò in pianu. 

Quand'ellu si discitò, era appesu per i pedi in una pezza bughjicosa, spugliatu in Cristu. A so bocca, chì avia sunniatu di basgi infiarati, era tuppata da un pezzu di stofa brutta è puzzulente. Ingiru à ellu, un catamanzu d'ogetti tralasciati da l'anni cumpunia un orrende sottusopra. Cù e so bracce, ch'ellu stinzava à staccalle, pruvava indarnu à pisassi è dà sullevu à e so carne tazzate da u canapu. E so dite pudianu ghjustu sfiurà u sulaghju impiciatu d'una materia nera è ogni sforzu facia cresce u dulore. U capu à l'orlu di scuppià, vide in una nebbia pagna trè macacciule chì intrianu in a pezza. Mentre chì duie s'avvicinavanu, a terza stede nù l'ombra. U primu colpu minò à u fegatu è fù u dilughju. Cum'è dui buzzori à nant'à un saccu di rena pichjonu à sciappassi e mani. Per l'anche è e bracce, si ghjuvonu di legna è di farru. L'omu sintia u sangue invadeli a gola è inciccià u stracciu chì assuffucava i so mughji. U lume zirlò è li brusgiò l'ochji. In un ultimu sforzu per teneli aparti, ricunnobbe a giuvanotta. Vistuta di manera sfarente, i capelli stinzati per parè più corti, passava da unu à l'altru di i so boia, li magnava a bocca à basgi diavuleschi. Eranu simuli, tale trè candelle di sangue. Infine a zitella s'avvicinò, cacciò u tissutu lascendu scappà una ganga liquicciosa chì u sulaghju parse ingollesi. U chjappò per i capelli, ponse e so lapre nant'à e soie è d'un colpu seccu, u scannò. A fola era bugiarda, ùn hè micca in u parcu chì u so baschicciu fù trovu. Quandu omu u scuprì ghjacia nant'à un lettu di mullizzu in un ruminzulaghju salvaticu da sopra a cità.

I trè Dumenicu (2/3)

Una nuvella di Jean-Yves Acquaviva

In furia i so ghjorni brusgionu di u stessu incendiu. Ogni mane, quandu u sonnu scappava, vultendu in a so tana da urdisce torna qualchì incestuosu fattu, Dumenicu ùn piantava di sunnià. Ùn ci vidia nulla di bruttu, ùn era tuttu à fattu a so mamma. Una mamma ùn hè micca solu un corpu. E carezze ch’ella li avia ricusatu, e vulia, eranu u soiu, a so lascita. Durante dece anni, crizze u so sonniu impussibule, cuntistatu da a realità chì d’altri l’impunianu. Aspittò cun pazienza chì l’azardu l’insegni u sensu di sta vita lazza. Hè cusì chì li cascò quella chì avia da dà anima à a so scimizia trilogica. Fù stupitu da i tratti di Lena, una giuvanotta stampata à quella chì l’avia parturitu. Vide e so mani, sentì u so calore currendu nant’à a so pelle à sfrisgiate difese è sappe ch’infine pudaria fà l’amore senza chjode l’ochji. A sera stessa li cidò. 

Lucia acciaccava l’omi nant’à a u ballatoghju. Tale una pretessa di l’Egittu anzianu chjamendu à quandu Hathor à quandu Meskhenet, l’abbagliulava cù i so undulimi. Dumenicu pinsò ch’ella era fatta per asconde in sè u fruttu di u so fantasimu è ch’ellu ùn era à ella di pricurà i Dii. Era à elli d’inchinassi, di chere a limosina d’un sguardu è di piegne u fiascu di e so pratese dilluse. Saria soia, cum’è a tuntia pussede un’anima, sana sana. Dumenicu sdignava a spiranza, preferenduli u sonniu ch’ellu avia da toglie di u piombu di u so sonnu da fallu turnà oru d’una realità chì li duvaria a vita. Forse qualchì Diu o i so figlioli avianu fattu di più cà quessa, apparnendu muntagne o aprendu camini meza acque furibonde. Si sà a ligenda d’unu chì rinvivì dopu à esse statu inchjudatu à una croce d’infamia. Si conta ch’un antru dumò un lione à u coghju duru cum’è u farru, corse cum’è u ventu o vultò da l’infernu. Tuttu què ùn era nulla sicondu à Dumenicu. Ellu ch’ùn era ch’un omu s’appruntava à fà centu volte di più. Trè notte di fila, a fidighjò passà da l’unu à l’altru, avvicinendusi di centu senza strignene mancu unu, accatizzendu fochi ch’ella ùn spignia mai. Una mane s’avvicinò d’ella, a pigliò per a vita è basgiò u so collu. 

À Dumenicu li piacia l’acquata. Quella chì prima spisciuleghja è po si trafura in a tarre assitata da a statina. Ci era, da sopra a cità un locu miraculosu à i so ochji. In cima à un chjassu tralasciatu, un alburu gigantescu supranava un pratu d’arbigliule varie. Aspessu vinia à pusà à i so pedi. Smaria nù a so ombra, si cunfundia una stonda cù a so buchja millenaria è si chjappava a so eternità. Hè una di ste volte quì, quand’ellu era alburu, ch’ellu vide à Tiziana indu u solu locu duve ellu ùn circava micca, avia trovu u terzu cuntinente di a so tarra prumessa. 

Francate da u so amante di i pinseri materiali, e trè elette campavanu ogni siconda di sta vita sunniata ringraziendu u so benfattore. Quand’ellu fù assicuratu ch’elle dipindianu d’ellu senza tenelu caru, disse à ognuna u so prugettu dumandenduli s’elle u suvitarianu. Fecenu tutte a stessa risposta, ch’ellu era abastanza bellu è riccu per fà ciò ch’ellu vulia, tuttu ciò ch’ellu vulia. Ridia arricurdendusi di quandu l’avia addunite. Era à a terrazza d’un caffè. Nanzu di righjungnele, avia fidighjatu a scena strana di ste trè donne chì s’eranu ricunnisciute à u primu sguardu è si campavanu d’una situazione chì n’avaria fattu fughje bon parechje. Dumenicu avia travagliatu bè è avà pudia assaghjà u fruttu di i so stanti. Aldilà di ciò ch’ellu stimava esse una prova artistica, ci era u fantasimu saziatu, quellu d’un harem affidatu à a so parsona. Trè donne, ognuna brusgendu di a stessa brama di suddisfallu è pronta à strughje ogni inibizione cù a sola spiranza d’esse a preferita. A so scimità narcissica si truvava magnificata. 

Da a prima siconda di a vita ch'ellu spartaria oramai cù i so figlioli, Dumenicu l'insignò u dommu chì duvia esse a regula assuluta di ste trè esistenze, tantu liate trà di elle cà a soia. Parechje parsone per un solu spiritu assugettitu à a so vuluntà. Francati da tutt'altra forma d'influenza, crisciarianu in u so circondu, sarianu u prulungamentu d'ellu stessu è forse, i lasciaria campà dopu à ellu. I ghjorni scorsinu, i mesi, l'annate, senza chì nulla venghi scumudà l'alivellu di i quattru Dumenicu. Eranu cum'è salvati da una guerre chì avaria struttu ogni vita ingiru à elli, lascenduli daretu à i muri di u so casamentu, solu locu risparatu da u spiantu. Longu sett'anni ste criature ùn cunnobbinu un altra forma d'umanità cà quella di u so chjerchju. A caduta di st'imperu fù viulente è veloce quantu era stata longa è paziente à so custruzzione. Un simplice colpu di filu, qualchì siconda d'un monologu incapiscitoghju è a so vita capiciuttò. A surgente era siccata, soldi piazzati à a scimesca, a borsa chì ciumba, un putsch à l'altru capu di u mondu è ùn firmava più nulla d'una furtuna immensa. Una vita frazata, sacrificata à a brama d'ùn more mai è a morte, finalmente, per solu scappatoghju.

I trè Dumenicu (1/3)

Una nuvella di Jean-Yves Acquaviva

À pusà nant’à e scale di l’intrata di l’ospidale, Dumenicu gode di a so vittoria. Ci era ghjuntu, avia compiu ciò chì u facia campà dapoi tant’anni, l’idea scema chì u so spiritu avia cuncipitu è nutritu à sin’à duvintà a so sola pinsata. Li saria piaciuta à esse scrittore, musicante o pittore ma talente ùn avia. Da zitellu avia capitu ch’ellu ùn avaria mai da imprimurassi di e cose materiale è s’era mossu à invintà una forma nova di creazione. Saria genitore ma d’una manera sfarente, un pocu cum’è e donne chì pudianu purtà a vita in elle. Chì eranu l’omi di pettu à quessa, chì eranu duie siconde d’un’anomima scrachjata in paragone à u calore d’un corpu dedicatu à dumane ? Ghjuntu à u tristu bilanciu chì u soiu ùn accugliaria mai cà robba da pasce i so suchji gastrichi, pigliò una decisione. Truvaria trè donne è sugillaria cun elle un pattu chì u Diavule stessu ùn avaria rinigatu. L’abandonu di a so anima, di u fruttu di a so civa barattatu cù suldacci. I suminaria, cum’è omu face d’una tarra fertile è s’incittaria a biada per ellu solu, lascendule cuparte d’un oru cusì bè stantatu. Ùn eranu per ellu cà i strumenti di a so brama d’esse aldilà d’ellu stessu, d’esiste da un opara chì nimu avia arditu. 

A so invistita saria a cità. Ci era ingrandatu è ne cunniscia tutti i dimonii. Sapia ch’elle eranu quì à aspittallu, campendu gnurante di u so distinu. I buscaria, l’ammansaria è l’adunisciaria per una notte. Ore è ore, l’unuraria, passendu da una à l’altra, mursichendu senza frenu à i frutti di e so pelle offerte à a so pazzia. Sarianu belle, sinsuale è abbastanza perverse per accittà di sparte u stessu piacè. À l’alba, e lasciaria addurmintate, stanche morte è suminate da u so sonniu, aspittendu cun pacenza ch’ellu fussi à u mondu. 

In più di a furtuna, a vita avia rigalatu à Dumenicu ogni arma nicissaria à a so questula, a billezza, un’educazione fine è una cultura duppiata da una maestria naturale di e parolle. Sguasi tutte e donne ch’ellu fraquintava si sarianu dannate per i so favori ma nisuna l’avaria datu ciò ch’ellu vulia. Eranu troppu intimurite malgradu e so teurie disincantate nant’à l’amore. Mai a so vanità n’avaria patutu d’ùn esse cà l’attrazzu di e so visione d’avvene. L’avarianu ghjudicatu è cundannatu da l’altu d’una murale ch’elle calpighjavanu da per elle senza vargogna. Pudianu fà vaglia in u lettu d’un’altra o tralascià un maritu troppu cumunu. Ma esse l’arzilla ch’ellu manighjaria, i culori ch’ellu imbulighjaria da pingne ciò chì mai ùn si pinse, era troppu per elle. 

Andò sin’à decide di a data di nascita di a so priziosa ciucciata. Da falla, li ci volse à ugne a patta di qualchì figliolu d’Ippucratte caramente attaccatu à u ghjuramentu di u so babbu. Cusì, pobbe cagiunà, sguasi attempu, u sbuccime di e trè ninfe quandu u primu ghjumellu dede un segnu di a so voglia di lume. Fù un ghjornu di dicembre, nù a fritura assulanata d’una maitinata calma chì Dumenicu pobbe infine rimirà u so capi opara. Dui masci è una femina ch’ellu si mosse di caccià à un pocu sicuru ma pussibule desideriu d’amore maternu. Rimesse à ognuna a cartulina culor d’oru chì e cunduciaria à u tisoru ch’ellu avia amansatu per elle. Prima, li fece signà un cuntrattu chì e sciuglia di u so duvere di mamme, lascendulu solu è unicu tutore di sti zitelli ch’elle scacciavanu da e so vite dopu à avella fatta da elle stesse. Ùn e vide mai più. 

Qualchì volta si ramintava cumu l’avia trove, allittate è cunvinte d’assuciassi à u so prugettu. A prima tappa fù a più difficiule. E scelte ch’ellu avia fattu, per ùn esse cà fisiche, eranu assai pricise. Duvianu esse bionde, di taglia mizana et bè prupurziunate, simule à e so proprie surelle s’ellu n’avia avutu. Dumenicu vulia ritruvà a fiura d’una mamma ch’ellu tinia caru à a scimesca. Ci vulia chì u so visu sia u spechju parfettu di a fottò ch’ellu tinia in borsa. Stracciata è po incullata torna, culpita da a so ira è dinù allisciata da e so carezze, stava sempre cun ellu. Era a sola fiura ch’ellu avia d’ella, giovana, bella è smarita. Si n’era andata, subitu dopu à a so nascita lascendu a rispunsabilità di a so educazione à un omu chì ùn avia mai sappiutu nulla di i bisogni d’un zitellu. Ingrandò indu l’ombra d’una chimera mitificata da l’assenza è quella d’un babbu chì delegava u so duvere d’amore à i so impiegati. Vinia d’avè quindeci anni quand’ellu scuprì infine u so visu. S’innamurò nù a siconda. Tandu, e so notte piccionu à u focu di a brama. Ogni sera u so sonnu spugliava a pelle di sta donna è i so ochji ingordi ne visitavanu ogni cuntornu. Era curtigiana è ellu rè zitellu ch’ellu ci vulia inizià à i savori pruibiti. Nù u dicoru d’una stanza reale, nù u rasu è a seta tissuti per u so piacè, si stracquava, superba è lasciva. È cum’una puttana, a prima d’un rè, di quelle chì i facenu, l’apria e so anche.