Una nuvella di Marcu Biancarelli
Una volta chì a scola era chjusa, socu andatu à pusà in caffè par veda sì Amandula ùn passaia micca in paesu - vocu sempri à pusà in caffè par veda sì Amandula passa... Com’è ugni volta m’hè stata un suppliziu d’ùn so quantu ori. A parsona finisci par avvizzassi à u so suppliziu, finisciaria guasgi par vulè bè a so prighjoni. In tutti casi, finisci sempri par truvà un sensu à i spassighjati di l’altri prighjuneri. Un cumpagnu briacu m’hà dittu un ghjornu - manera di parlà, eramu di notti - ch’iddu ùn era mai partitu parchì ùn c’era chè quì ch’iddu pudia spona a so suffrenza, scuntrà da veru un ecu à i so lagna. Ci hè da creda chì finalamenti hè u nosciu piaceri. Truvemu un piaceri assulutu à lacacci imprighjunà quì spachjendu a noscia suffrenza à l’unu è à l’altru. Iè, ci sarà un sensu cullittivu di a suffrenza, un’ armunia cullittiva di i piaceri masuscisti. Ci sarà par tutti u stessu bisognu di bia i lacrimi di a prissioni è di a midiucrità. Ancu i nosci numici parini di bia à a stessa funtana. Ni voddu par prova ‘ssu ghjocu chì cunsisti à ùn salutassi micca, un ghjocu chì pari ammaistratu da tutti i zucchi chì pupulighjani ‘ssa piazza.
Aspittendu à Amandula, com’è sì no’ t’avissimu da veru un rendez-vous, mi socu avvistu beddu à spissu ch’iddu mi ci vulia à fà attinzioni d’ùn istringhja micca a mani à quali ghje’ ùn voddu micca. Falendu in carrughju, mi ci voli à evità di dì troppu bonghjornu. Chì quiddu chì hà da dì bonghjornu à tutti hè un debbuli o un simpliciottu. Subratuttu chì à spissu l’aienti ùn arrispondini micca. Si faci un gestu cù u capu, o un surrisu, è l’altru ghjira a tencia, faci neci di nudda, u so visu si chjudi di manera supiriori. Dopu quiddu chì hà lampatu u bonghjornu ferma com’è u Vacchesu, à bertuli in manu, ferma mali è li stà bè, ùn hà chè à sapella. Unu chì ùn arrispondi micca è seti mali pà a ghjurnata. Certi t’ani i so raghjoni pà ùn arrisponda, ma ci hè talmenti stodii in ‘ssu paesu chì à a fini ci ni smintichemu, di i raghjoni. Và bè pà u me anzianu sociaru, o u maritu di a me anziana moglia, cun quisti ùn ci hè più nienti à dì, è a firita hè prufunda da i dui canta. Cun quisti ùn ci salutemu micca, ci scruchjemu senza mancu più vedaci, di manera guasgi naturali. O allora sapemu chì no’ semu rispittivamenti i primi in a iirarchia ch’ùn si devini micca salutà. Ancu più, d’ignuracci mutualmenti hè una manera d’intarrà u passatu, di circà di fà creda à l’altri ch’iddu ùn ci hè mai statu nè matrimoniu nè ingannu, nè spiccanza nè suffrenza. Ùn si hè passatu nudda, nò, è u prima chì palisaria un iniziu di ripintimentu, una mità di bonghjornu, faria beddu più chè perda a faccia, scitaria tuttu ‘ssu passatu chì nimu voli più mintuvà. Ma certi volti i raghjoni sò più scuri, menu fundii. Tandu ci hè u priculu da veru, l’umiliazioni risica d’essa u à cantu ‘llu smenticu. Sapemu, iè, sapemu cun quali ci voli d’essa indiffarenti, ma puri accadi d’essa suspresu, o a situazioni faci chì vo diti bonghjornu di manera guasgi miccanica, senza rifletta, senza pinsà à i raghjoni, parchì a testa di l’abruttitu chì vo ùn pudeti pata vi hè stata ancu familieri, un parenti allargatu ch’ùn mireta mancu a corda, un cumpagnu di scola guasgi sminticatu cun quali vi battiati sempri, o un paisanu appena idintificatu maritatu oghji cù una donna chì vo eti cupartu un ghjornu. Cun quisti a putenza di i raghjoni pò essa sfassata da u tempu. È rabbia ! Seti cascatu in a trappula è u tippu vi pianta quì è firmeti com’è u biccazzu, cù a voscia vargugna è u vosciu odiu cuntinutu, chì ùn lu pudeti mancu richjappà è dilli : "Oh ! Me omu ! Parchì ùn m’arrispondi micca ? Sciappati ùn ha’ ma presu ?" Ùn la pudeti micca fà parchì ùn lu duviati mai salutà senza sponavi à a so indiffarenza, parchì duviati cunnoscia ‘ssi raghjoni chì vi rivoltani avali chjaramenti à u spiritu. Seti in tortu, pienamenti, è ùn mancaria più par aghjunghja à a voscia umiliazioni chè in subrapiù vi piddessiti una rivista par avellu scuzzulatu di manera gratisi.
U peghju hè quand’ì dui ch’ùn si devini micca salutà, parchì i raghjoni stavolta sò veramenti sedii - ma ugnunu u so sediu - si mettini à salutassi tremindui, ch’iddi cascani à tempu in a trappula. Tandu ugni prutagunistu si dici : "Mi saluta par muscià ch’iddu ùn hà micca a paura di mè, mi voli metta a prissioni, mi rilancia. Ma a ddi mettu anch’eu a prissioni ! Ha’ vistu com’e’ l’aghju dittu bonghjornu ?!" U lindumani i dui stessi, pà ricunquistà l’onori persu di a vighjilia, s’ani da ignurà dinò com’è sì mai nimu fussi cascatu in a trappula, è i dui s’ani da dì : "ha’ vistu, ùn l’aghju micca dittu bonghjornu... hè statu suspresu. Si vidia ch’iddu era suspresu. T’hà a paura avali... hè iddu chì t’hà a paura... o socu eu... nò, hè statu suspresu, t’hà a prissioni". È a prissioni missa pari u scopu di ‘ssu ghjocu scimitu. Mettasi a prissioni, sfucassi da a prissioni. Ma eu, chì vo’ a sappiati par sempri, ghjocu mali. Ùn hè micca ch’e’ ùn socu micca capaci di metta a prissioni à calchì ad unu, chì ghjeu ùn sighi bonu à ghjirà u capu pà rifusà un salutu, nò, quissa a socu fà è a facciu o menu vinti volti in a ghjurnata. Nò, hè chì ghjeu ùn ghjocu micca cù i stessi reguli chè l’altri. Comu dì ? Ghjocu simpliciamenti par urgogliu, o parchì m’annoiu, o allora ancu parchì ghje’ socu troppu tranchju par intigrà tutti i reguli di u ghjocu, o ancu certi volti ùn dicu micca bonghjornu cussì, senza raghjoni, parchì ghje’ mi sentu cumplittamenti supiriori à l’abruttitu chì mi hà salutatu, par ùn avellu micca à mezi peda. Più suventi, ùn salutu micca parchì ghje’ socu in unu statu cumplittamenti vighjitativu, socu assentu, acciaccatu da i mura di a me prighjoni è postu à pusà à a tarrazza di ‘ssu caffè par abitudina, parchì hè a posta bona par veda passà, in casu mai, à Amandula. È po’, subratuttu, mi pari d’ùn risentala micca da veru, a prissioni missa. Ùn parlu micca di a prissioni ambienti, quissa mi tumba, o allora ùn sariu micca un prighjuneri, ma dicu a prissioni ricircata, data, quidda chì faci bulà un risicu d’affruntamentu fisicu. T’aghju, com’è tuttu u mondu, a paura di piddammi una concia in piazza publica, è d’essa dopu ubligatu d’andà à salutà u me boia calendu u capu in signu di suttimissioni, com’iddi a facini tanti, ma ‘ssa paura quì laca a piazza à u sintimu ch’e’ t’aghju d’essa beddu più priculosu ch’è quiddu chì mi pudaria minà. À spissu mi dumandu ancu s’è ùn l’aspittariu micca una sciappata in piazza publica, par essa guasgi ubligatu di scatinà i forzi cuntinuti di a rabbia è di u rincori, è annigà tuttu st’affari, tuttu st’annoiu in una vindetta sangunosa. Hè da monda chì ghje’ socu chì a vindetta mi faci trimulà, ch’idda currispondi à l’idea ch’e’ mi facciu di a ghjustizia. Ghjeu ùn curgu micca com’è certi impressu à una paci ‘lli bravi, ùn dicu micca ch’iddu ci voli à pona i pistoli. Quand’e’ ni vicu dui chì s’imbuffani à cazzotti ùn mi mettu micca à mezu par appacià. Sì la facini, hè chì n’ani bisognu, d’imbuffassi u capu. È po’, hè una prighjoni, i conti ùn s’arrigulighjani micca davanti à u ghjudici, in i prighjoni. Quiddi ch’ùn pensani micca com’è mè è ch’ùn si credini micca prighjuneri quì ùn ani chè ad apra l’ochja o à ùn vutà più, chì infini ci voli d’arristà, hè bè u votu di millai d’abruttiti chì hà fattu di ‘ssu paesu una prighjoni. Tumbani un prifetta è falani à quaranta milla in carrughju à chera a paci. Dui ghjorna dopu i quaranta milla vani à vutà com’è un omu solu pà a ignuranza è a bistialità, i dui tituli di u sistemu chì permetti di tumbà i prifetta. Dopu sciaccamanighjani quand’iddi si piddani in faccia un’ uparazioni mani puliti ch’ùn hà par iscopu chè di ridrizzalli tutti quant’iddi sò ; tutti torti, tutti da ridrizzà, è sò talmenti dumati in u so spiritu di liccaculu di putenti ch’iddi ùn s’avvidini mancu chì pichjendu annantu ad iddi si circa solu di rinfurzà i muraddi di a prighjoni chì i riteni, si circa solu d’assicurà par sempri a putenza è a fidelità di i vardiani chì i survegliani quand’iddi vani à vutà. Mani puliti ? Manipulati, sì. Allora ch’iddi aprani bè l’ochja è ch’iddi mi lachini tortu com’ì ghje’ socu. Ùn aspettu à nimu pà ridrizzammi, eu. So tortu è ni so fieru, parchì tortu chì ghje’ socu, socu libaru. Libaru in una prighjoni, ma libaru listessi. A prissioni l’accettu parchì ùn aspettu micca l’affaccata d’un libaratori, parchì ùn leccu u culu à nimu è ch’ùn votu par nimu, è quand’e’ ùn vi salutu micca, nimu mi hà da furzà à falla. In ‘ssa prighjoni semu uni pochi di numari cuntabilizati nantu à i listi di rinforzu di i vardiani. A mè detimi u numaru 6 com’è in ‘ssu filmu inglesu è lachetimi strutturammi u capu cù a me prissioni è l’annoiu chì no’ c’emu custruitu quì. Ci emu da metta par subra i quaranta morti à l’annu chì no’ ci strascinemu quì è ghjudicà chì tutti i tiradori si poni bulià in u stessu saccu di disonori ? Ma eu mi sentu di tumbà un omu. Tumbà à nomu di a virtù, tumbà sapendu chì i mura di i prighjoni cascani à spissu in u sangu. Tumbani quaranta omini à l’annu è ci impidisci di dorma... Dui seculi fà ni tumbaiani setticentu, à l’annu, è durmiani. Criditi ch’erani più crudi chè vo ? Più bestii ? Ùn aviani micca sintimenti ? Ùn suffriani micca di i stessi dulori ? Ùn purtaiani micca i stessi doli ? Erani omini anch’iddi chì vo’ sappiati. Ma senza vulè rigrittà i tempi passati chì mi primurighjani d’altrondi pocu, credu ch’iddi ùn erani quì pà rinfurzà u puteri di nimu. Ùn erani micca numari, iddi, ed hè pò dassi par quissa ch’iddi sparaiani. Parchì ùn sapiani micca cuntà, o allora t’aviani pò dassi una grandi idea di ciò ch’iddi valiani, iddi, ùn liccaiani u culu di nimu, è quand’iddi erani à quaranta milla, ùn era micca pà dumandà u rinforzu di i muraddi di a so prighjò, era par mora com’è ghjacari annantu à calchì ponti, battindusi, virsendu u sangu, à nomu di a virtù è di a libartà. Ancu assà ch’iddi c’erani i narpii, tr’è iddi, ancu assà ch’iddi c’erani i latri, i vigliacchi, l’assassini, i tonti è i debbuli. Ùn s’agisci micca di dì ch’iddi erani eroi, erani omini. Ma s’iddu ci vulia, sapiani mora, è sapiani tumbà, è sapiani fughja, è sapiani vultà, ricummincià, taddà uni pochi di canneddi è spariscia in i furesti. Hè quissa a vita. L’omini ùn si tumbani micca chè in i filmi americani, si tumbani da veru. I suciità senza viulenza ùn esistini micca, merè, è ci vurrà ancu un pocu di viulenza par pudè misurà u prezzu di a paci. A virtù ci voli a cunquistalla, è sapè chì nocenti ùn ci n’hè micca. Oghji par pudè fà manghjà una famidda di funziunarii, ci voli à metta cintunari di SDF in carrughju. À u funziunariu, quissa, ùn l’impidisci micca di tichjassi, è quand’iddu vota pà i maghjali chì mantenini u sistemu, credi d’essa nucenti ? Nò, t’emu tutti i mani brutti. A viulenza, ancu assà ch’iddu ci ni voli. Quand’ì l’Arabuchji di i zoni ‘lli cità mettini u focu à u carrughju, vo mughjariati basta à a viulenza, inveci chì à mè, mi metti un cazzu trattu tamantu, a so viulenza. Ghje’ quand’e’ vicu l’omini chì circani di sciappà i muraddi ‘lli so prighjoni, risentu ancu una forma di rispettu, parchì ghje’ mi sentu incapaci di dalli una mani. A viulenza... a viulenza... D’accordu ch’idda faci mali, d’accordu ùn faci piaceri à nimu di leghja i noma di ‘ssi disgraziati in i ghjurnala, ma hè troppu faciuli di briunà cù i luba. Hè a vita chì faci mali, è unu hà dittu chì a vera suffrenza era ghjà di nascia. Briunà... voddu bè, ghjeu, ma à ugni brionu hè a catena di i vardiani di a prighjò chì si ristringhji un pocu di più. È l’idea di sbiutalli dui cartuccia in capu, à i vardiani, ùn vi hè mai vinuta à vo’ ? À mè sì. È mi pari chì a sibbula sighi quì. Partindu da ‘ssu affari, ugnunu pò duvintà una sibbula. Partindu da u fattu chì no’ semu in una prighjoni, ugni vardianu, ugni prighjuneri pò duvintà un numicu. Quand’iddu si vivi in un paesu dund’iddu ci voli à rifusà u salutu vinti volti in a ghjurnata, vi pari ch’iddu ùn ci volghi micca ad essa appena viulenti ? Quand’iddu si sà chì ‘ssu paesu interu si pò infiarà, ùn viditi micca un’ utilità à fà risenta à u numicu putinziali chì vo’ t’eti a cirtitudina di pudelli dà a morti ? Quand’iddu si sà ch’iddi vi brusgiariani in piazza pà a logica mercantili di luddu è austu, ùn criditi micca ch’iddu ci sighi quantunca un intaressu à essa priculosu ? Criditi da veru chì a parsona si prumenghi in i prighjoni fendu u basgiamani à tutti l’altri ditinuti ? È dalli u so culu in subrapiù, nò, di i volti ?
È po’ v’aghju da dì, parlà cù a boci di i me vardiani, quissa ùn la possu fà. Saraghju un criminali sì ghje’ socu chì i me vardiani sò cù u bon drittu. Di tutta manera qual’hè chì hà difinitu ciò ch’iddu era u bon drittu ? Ghje’ vi parlu di virtù dipoi un’ ora, ciò ch’ùn voli micca dì chì a virtù scantessi u viziu, à u cuntrariu, mi pari chì Blaise Pascal avaria scrittu chì a virtù ùn hè mai par ugnunu chè a simplicia maistria è a cunniscenza assuluta di tutti i so vizii, o allora circaremu un sensu più anzianu, più latinu, di a virtù, è com’è Machiavelli ci vidaremu una forma di virilità, di forza. Iè, parlaraghju di quissa, è musciaraghju à u numicu ch’ùn mi voli micca stringhja a mani com’ì ghjeu u possu pulsà cù u surrisu, li musciaraghju quant’idda vali pocu, par mè, a so vita.
Amandula veni di passà. Era à u bracciu di ‘ssu tontu di Petru Paulu - Petru Paulu ùn hè micca un nomu... Ma hè nurmali, sò di i stessi anni, scoprini a vita tremindui, ni sò à i primi futtiti, à l’appiattu in calchì machjonu accantu à u liceu. Li vurriu dì : "prufittetini, prufittetini bè nanzi chì tuttu schiattessi". Chì un ghjornu tuttu hà da schiattà, a so passioni, u so amori, è ancu u disideriu di a peddi di l’altru. L’anni, prestu, vinarani à sciappà ‘ssa rilazioni ch’iddi credini eterna, i quistioni si stallarani in ciò ch’iddi volini stabilitu par mai, è a culpabilità, u sintimu di culpabilità sarà l’ultimu vilenu di st’annati di filicità. Iè, li vulariu dì di prufittanni, o allora diciariu à Amandula : "Chì faci cù stu ghjuvanottu ? Hè sempri scatinatu à a scola è si perdi in i so illusioni, i so falsi verità. So sicuru ch’iddu ùn hè mancu bonu à copra. Ùn la vidi quant’iddu hè svaculitu ? Hè tontu in tuttu, hè ! Nò, à tè ti ci voli un omu, un veru. Voddu dì unu chì hà ghjà viaghjatu, unu chì hà vistu u mondu. Chì hà vulsutu bè è chì hà ghjà suffertu. Ben intesa, ùn saria micca par sempri, ma u tempu chì tù saristi cun iddu, o menu, impararisti à inizià senza sbagli u parcursu, impararisti à fà l’amori è à rilativizà, saristi più forti, più libara. Ti ci vurria à calchì ad unu chì ti lachessi insaccà a spirienza chì ti ci voli, ma à tempu ti spiicaria i cosi. Di chì discutti cù i to cumpagni di scola ? A più parti ùn si sò ancu staccati da a so mamma, t’ani sempri i mucichi à u nasu. Tù se più astuta, mireti meddu, mireti di sapenni di più, parchì tù t’ha’ a capacità d’intigrà i cosi, di capilli, è di ridà un ghjornu à un omu tuttu ciò chì tù avarè imparatu, parchì un ghjornu ci sarà un omu, sarà iddu, u mireti. Ùn mireti micca d’attardatti in ‘ssu tarrenu verghjini, cù ‘ssu ghjovanu chì ti parla di Rimbaud o chì ti mintuvighja à Jim Morrison. Nò, tù devi sapè nanzi di cummincià chì tù se una donna, se a noscia cundanna, bedda più intilligenti chè tutti l’omini chì tù scuntrarè. A sa’ ciò ch’iddu dicia Dostoievski ? Dicia chì l’omu hè un turziunariu, ma a donna, idda, hè un boia. Ti vurristi fà spinghja da ‘ssu Petru Paulu inveci di spannatti è d’avè ‘ssa forza ? Tù rifusaristi ‘ssu distinu, quand’ì tuttu in tè moscia a forza, a capacità, l’eccezzioni ? A me cara Amandula, virtù n’ha’ più chè mè, è ùn socu mai chè un ponti, un locu di passaghju, un’ apartura debbuli versu a to spannera. Aiò, lacalu andà, stu fuddettu, chì dumani à l’alba piddarè u to bolu, è iddu sarà spintu". Cussì li parlariu, à Amandula, è sciappariu u so sonniu dulci è tuntinu, sfassariu a fiara debbuli in l’ochja di Petru Paulu, è sariu un dimoniu neru. Suddisfattu, mi rifughjariu daretu à u me surrisu sfacciatu, u me surrisu di topu, filicitendumi d’avè vistu triunfà a prighjoni una volta di più. O triunfariu eu d’avè distruttu ciò chì nascia, micca solu par via di a me sola gattivezza, ma par dammi l’idea chì, malgradi sti muraddi, possu firmà immobili è triunfenti, possu agiscia contru à u non sensu di l’illusioni niscentri senza mancu pisà un ditu.
Ma, ùn fà nudda, par annoiu, o par lacalli una scianza. O creda chì Petru Paulu socu eu. Iè, socu eu Petru Paulu. Socu ghjovanu, socu un focu, u paesu ùn mi hà ancu imprighjunatu, ùn socu ancu u numaru 6, ùn socu ancu ‘ssu prufissori senza fedi è nemenu ‘ssu scrittori dialettali richjusu in un "righjulettu" scemu, par pruteghjasi d’un littori eventuali, ùn socu ancu inchjuvatu in a midiucrità è l’inutilità a più assuluta. Socu ‘ssu focu scatinatu chì curri impressu à a vita, ‘ssu ghjovanu scrittori ch’ùn sà ancu ch’iddu ùn hà micca talentu, parlu di studià, di veda u mondu, ùn aghju ancu dicisu d’ùn parta micca, è ùn aghju micca abbandunatu a pintura. Socu Petru Paulu, è Amandula mi fighjola cù tinnarezza. Ùn sà micca s’idda mi voli bè o nò, è di tutta manera ùn hà micca imparatu à vulè bè à altr’ affari chè mè. Socu u centru di u so mondu, a credu, socu tuttu ciò chì l’abbisogna, è nienti pudaria imbrutta o sfassà ‘ssu mondu quì. Ch’idda esista una prighjoni ? Ùn la sapemu mancu. Ùn la vulemu micca sapè. T’emu una forza !
Amandula hè passata. Petru Paulu m’hà fattu un gestu cù a mani senza affizzioni particulari, com’è par ubligazioni. Amandula, idda, m’hà surrisu, ma era un surrisu stranu, voddu dì guasgi inchietu. Mi surridia, è mi si hè parsu ch’idda mi intarrugaia. Paria di dumandassi s’idda mi cunniscia ghjà, micca com’è u so prufissori, ma com’è s’idda avissi dighjà vissutu sta scena in un’ antra vita, ma com’è sì una rilazioni particulari era ghjà esistuta tr’è no. In u so sguardu aghju capitu ch’idda si punia sta quistioni, ch’idda circaia d’induvinà parchì l’eru cussì familieri. O aghju sunniatu. Si hè ghjirata versu Petru Paulu, timica, è l’hà presu a mani, ma si sò lintati guasgi cussì prestu. I so mani si sò strinti, è deci sicondi dopu, com’è par ùn tradisciasi à nimu, si sò sciolti. È sò passati tremindui davanti à mè, ani francatu ‘ssa piazza com’è dui chì duvariani cuntena a so passioni, piattalla à l’altri. I so dui mani si sò lintati. "A prighjoni", mi socu dittu trà mè stessu.
« Lei sà dove ci sono le ragazze ? » (15/08)
Arrestu in un pub chì porta u nomu di u carrughju : l’Oliver Plunket. Un accessu wi-fi permetti di stancià a noscia curiosità annant’à l’identità di u parsunaghju. Imparemu u sant’omu ch’eddu era è qualissu fù u suppliziu trimendu ch’eddu cunniscì, in seguita d’una diffamazioni. Quissa ramenta à u spiritu di Cesaracciu una altra morti infamanti, quidda d’una certa Claudine de Culam. Prima martira di a causa animali. Un sicondu whisky par mè, dui bieri pà Mathias è Cesaru. I dulori à u corpu sò di più in più pinibuli, ùn cissarani chè dopu ad avè lacatu Galway, dui ghjorni dopu. Avemu dicisu d’un locu par fà cena. L’azardu ci porta versu u solu risturanti talianu di a cità, un talianu vulendusi « di standing ». Intrimu. U capu di sala ci stringhji a mani è, senza ch’avissimu prununciatu a minima parolla, ci parla subbitu in talianu. I nosci tenci ci tradiscini. Sarà d’altrondi monda quistioni, mentri ‘ssu ripastu, di frenulugia, d’antrupumetria è di i corrilazioni dubbitosi trà l’usi è i tippi fisichi. U prublemu – beddu più impurtanti chè ‘ssi cunsidarazioni lombrosiani – di a prisenza di puttani in a cità di Cork cuntinuveghja à spirità a cunvirsazioni. Si trova chì u servori chì ci piglia in carica hè un Sardu, veni d’Olbia. « Siamo vicini », dici tuttu cuntenti. È postu ch’avali semu vicini, Mathias ni prufitta par ponali a stessa quistioni chè quissa posta da Cesaru à l’impiicatu di culori uni pochi d’ori nanzi. Semu u calvariu di l’immigrati di ‘ssu paesi. U ghjovanu servori hè finu, bellu è raffinatu. Custituimu, à mezu à i Celti chì occupani guasgi a tutalità di i toli di u stabilimentu, com’è un pezzu di tarra galluresa prughjittatu quì da ùn so’ chì magia bughjicosa. Sarà forsa pricisamenti ciò chì quiddu picculu servori si duvia dì, immigratu in Cork ghjustappuntu pà ùn avè più nienti à scumparta cù i tippi chì li dumandani, in ciò ch’hè par eddu un infettu sabbiru di i campagni sardi, induva hè pussibuli di truvà da copra. Ùn emu mancu tantu capitu a risposta ch’eddu feci à a dumanda di Mathias.
