mercredi 2 décembre 2015

American progress (2/2)

Una nuvella di Fabien Raffalli

Ci stemu à veghja fora dopu fattu cena. Ci hè tutta a famiglia è parechji amichi pruprietarii di i ferme vicine. In giru à u focu, si ride è si ciarla. U mo fratellucciu stuzzica a rusta, e fiare russicce a si chjachjareghjanu in un’unione fraterna cù u neru di a notte. Face u frischettu. M’arrizzu per andà à circà una ghjacchetta. S’avvicinanu à l’appiattu, senza chì nimu i vedi nè i senti. U primu chjoccu d’accetta hè cum’è un trostu, pichjendu in capu à tutti è lascenduci intelati è imbasgialiti. Fù per babbu. Piscò sopra à u fronte è a so capochjula si sbaffò cum’è un arburu toccu da a saetta. U sangue zirlò à buzeffa. Ùn s’avvide di nunda. Ùn ebbe mancu u tempu di ghjunghje à basgià a terra chì i nostri casconu ancu elli, guasi à tempu. Ci ne fù per tutti, babbi, mamme è figlioli. 

Feghju a scena per a finestra di a camera, à fucile in manu. U mo core mi pricureghja di sorte è fà focu per difende i mei. U mo cerbellu mi cummanda di stammi fermu. Una di e mo surelle chì s’era scantata da u focu cappiò un stridu chì mi ghjunse à l’osse. Ne vidii unu chì curria versu ella, briunendu cumè un diavule è chì li si lampava adossu. 

Ùn si sente più nunda. Ci hè solu u rimore di i pugnali chì strufinanu contru à e chjocche. E fiamme rughjinose anu u so chì fà à taglià a pelle fine di u capu. L’affare ùn durò tantu. Sò digià smariti, quant’è apparizioni di l’infernu. Trovu finalamente a forza di movemi è tuttu hè calmu fora. Mi stò arrittu davant’à sta visione orribile. I cadaveri ghjacenu, e cerbelle à l’aria, stinzati, à corpu inghjò, vicinu à e panche induv’elli stavanu à pusà qualchì minutu nanzu. L’assassini anu scalpatu omi è donne secondu i so riti funesti. 

Tutte e notti facciu stu sugnacciu, mi rivegu à fucile in manu, in quella camera, paralizatu da a paura è da una vuluntà di sorteci à bè. Vulerebbi esse in altrò, vultà u tupezzu è pruvà à fughje luntanu. Mi dicu chì u mo vigliacchisimu m’hà privatu d’una morte viulente ma ancu d’una vita chieta. Oghje, feghju in giru à mè è à mezu à i cadaveri sentu l’odore di a morte appiccicata à l’erba secca, brusgiata da u sole è u sangue di u nemicu. Sentu un ratalu d’agunia, mi girgu è vecu un omu inciaccatu sottu à u pesu di u so cavallu, e so anche tronche di sicuru. I mo cumpagni s’avvicinanu, l’anu intesu ancu elli. Hè u solu chì a s’hà francata dice unu, casca à bè, l’emu da fà pagà per l’altri. U liberemu di a so prigiò di carne calla tazzata da a mitraglia. Mughja è ci minaccia. Ùn ci femu mancu casu, ùn riprisenta nisun periculu. Dopu à ogni battaglia, simu parechji à avè pigliatu u mendu di tenene sempre unu o dui in vita per sfucacci. Una di e nostre pratiche preferite cunsiste à sciaccalli à pelu è a ficcalli qualcosa in u fundamentu. Oghje tocca à mè. Ùn mi face nunda ch’ùn li possu più vede sti inculati, ma ùn l’aghju mai fatta direttamente, cuntintendumi di teneli. Senza mancu tantu riflette accettu. Sò statu vuluntariu per sta intrapresa è ùn mi possu sfà di e mo rispunsabilità.

Simu ghjunti quì secondu una vuluntà divina, aghju finitu per capilla. Mi tengu sottu à a bandera stellata, simbulu di sta nazione d’omi liberi. Mentre parechji mesi, aghju pensatu chì quella notte m’avia pigliatu a mo vita. Pensu avà ch’ella m’hà levatu soprattuttu e mo illusioni. U mo destinu manifestu à mè ùn era di purtà a demucrazia lavurendu a terra. Eppo quale hè chì ci hà mai credutu à stu puttachju di a demucrazia ? S’ellu ci n’hè seranu pochi. L’avvene s’occuperà di scioglie i nodi chè n’avemu intricciatu ma intantu, stu mondu ci appartene. Iè, stu mondu novu hè u nostru. L’avimu fattu noi.

5 commentaires:

  1. U prossimu testu hè prugrammatu u 7 di dicembri. Sì l'ordinatori teni sin'à quì... (Picculi prublemi di funziunamentu in 'ssu mumentu...).

    RépondreSupprimer
  2. Tenite forti o Webmà, "crociu i diti" per voi. (si dice di sicuru d'un'altra manera què ma per disgrazia ùn a sò !)

    Salute o Fabien,
    Poca storia sta nuvella. M'hà datu u fretu à l'osse, m'hà datu, ancu sè ciò chì vo' cuntate è bè à modu vostru hè accaduta, accade sempre d'una manera o di l'altra è s'hà da accade torna vistu u mondu induve no' campemu. L'accaparrate di e terre di l'altri cù viulenza, l'inghjustizie, u disprezzu di u putente pè l'omu vintu, tuttu què ùn pò fà nasce chè u bischizzu è una brama chì quasì pare un bisognu di vindicassi. È vìa è dalli a morte chjama a morte è per dilla corta : a capra hè à tutti, ma a raghjò à quale hè ? È in più aspessu ùn sò mancu quelli chì anu ingeneratu u scempiu chì pàganu i disguasti. Tandu torna scema è ceca a vindetta, ma comu fà ? Quì u narratore, prima figliolu di espugnadore duvinta vìttima, vittimatu ch'ellu hè da e vìttime d'eri. Tandu anch'ellu s'hà da vindicà chì privatu ch'ellu hè statu d'una morte viulente, hè ancu privatu d'una vita cheta. Ed ècculu in veru u stentu di a fola di a vita umana. Di pettu à què, hè vera chì vale a dimucrazia ?
    Dà da riflette ben intesu u vostru scrittu, ma aghju quantunque una dumanda à favvi : st'idea di nuvella comu m'hè vinutu in capu ? À dilla franca à a dimucrazia ci cridite o fate dì à u narratore di sta nuvella ciò chì vo' in veru pensate ? Sareste prontu à tumbà à qualchìssìa ghjustu pè u mutivu ch'ellu sarebbe di listess'urighjine o di listessu razzinu chè uni pochi chì avarèbbenu pussutu noce à a vostra famiglia ?
    In tutti i casi, u vostru scrittu ci pone sta questione diffìciule à scioglie "da luntanu", vogliu dì senza esse statu toccu da vicinu da un'affare cusì.
    Sò stata troppu longa, scusatemi..., m'hà intrappulatu a funa, m'hà intrappulatu ! Avà vi lasciu, Bona furtuna è Tanti Scritti da vene...

    RépondreSupprimer
  3. Di Sfughjita, i vosci cumenti sò ugni volta un incantu, è un incurraghjimentu chì ci cunforta in i nosci impegni (chì sò piaceri, l'avareti capita !).

    Trasmittimu i vosci dumandi à l'autori, spirendu ch'iddu cansarà à davvi dui risposti.

    À prestu.

    RépondreSupprimer
  4. A ringraziavvi per a vostra lettura è u vostru interessu DI SFUGHJITA.

    Parlendu d'avvintura, m'hè sempre piacciutu u tema di a scuperta di e Meriche.
    Quì, m'hè parsu interessante di mettemi in u capu d'un giovanu allevatu in u sintimu di l'epica, ch'ùn li permette di vede stu mondu novu cù l'ochju di u nativu ma solu cù un sgardu d'Europeanu. Tandu, da ch'omu appia l'unu o l'altru, u cuncettu di demucrazia, chì porta valori pulitichi, suciali è culturali piuttostu umanisti è à prò di u cumunu, pò esse sviatu.

    Ma ùn vogliu custringhje stu scrittu à una sola esaltazione di u populu amerindianu. Si tratta di l'omu in generale, qualsiasi a so origine, è di a so capacità à esse un assassinu in putenza.

    RépondreSupprimer
  5. V'arringraziu assai tutt'à dui. Chì vo' rispundiate à i mo cummenti, u pigliu da rigalu è dinù da incuragimentu.

    O Webmà à truvacci u 7 di dicembre, spirendu chì da quì in tandu l'impegni vostri vincinu i capricci d'a tècnica ! Tenite forte ! Evviva a Fantesìa à estri sciolti ! Evviva u Tonu è a Timpesta ! Scialàtevila è à prestu...

    RépondreSupprimer