lundi 28 novembre 2016

Sessu, droga è Babbu Natali (Natale Guastu, testu 3)

Una nuvella di Stefanu Dinelli


Avà n’aghju una techja. Sò anni è anni chì focu u tippu bravu. Socu un mezudiu, mi dumandeti è rigalu. Rigalu. Senza rifletta, socu un diu di merda. O alora seti voi i me dei. Dumandeti è focu. Avà n’aghju una techja.

Hè statu bravucciu u zitellu ? Hà bè travaghjatu ? Mi n’impippu eiu ! Vuleti tutti un Iphone o un ritrattu di Hanouna… Eccu ciò ch’aghju da fà :

- À chì voli l’iphone, u purtaraghju in China à custruiscialu in l’usini
- À chì voli u ritrattu di Hanouna, li daraghju centu grammi di cocaini
- À chì voli a paci in lu mondu, li purtaraghju calchì fucili
- À chì voli smagriscia, li taghjaraghju a panza
- À chì voli una vittura, li truncaraghju i ghjambi

Stu Natali hè par mè, sarà u me Natali più bellu ! 

È criditi chì i me fuletti cantani di ghjoia ! Ch’elli fistighjani ogni ghjornu ! Iè chì biini ! Ma hè parchì ùn aghju micca moghja è cum’è socu un Diu, aghju una libidò di quella ! O li tinti ! I cattivi, i belli, i puzzò, i sdinticati… Tutti ! Hè colpa voscia ! Vecu tuttu ! Quandu Marcu si seca annantu à Lisa, a vecu. Quandu un altru si metti nudu cù Laura, è ch’ella mughja « O Capità ! Iè ! Più forti » a vecu dinò. Eiu, manc’una donna. Una volta aghju pussutu essa cù una donna, ma solu pà sapè l’effettu. Socu statu maladettu dopu… M’ani pruibitu di tuccà i donni, chì di a noscia addunita sò nati cinqui centu cinquanta cinqui fuletti. Era una funtana. Hà mughjatu mentri più d’un mesi pà dà vita à li me fighjoli… Quand’elli m’ani maladettu, n’aghju magnatu sissanta sei, di rabbia. Ma nulla hè cambiatu.

È parchì pinseti tutti ch’aghju cervi ? Hè vera chì à mumentu, viaghjaiu à dossu di cignali o à dossu di sameru, è una volta à dossu di un camellu è mi chjamaiu Babbu Nahali, ma mai ùn aghju avutu cervi. I soli cervi ch’aghju cunnisciutu, era ind’un piattu, cù una bella salsa insanguinata. È Coca Cola chì m’hà vistitu di rossu… Nanzu pinsaiati chì purtaiu un custumu verdi, forsa pà a spiranza… Innò. Ùn hè cusì l’affari. Vocu sempri nudu in Cristu, u cazzu libaru. Mi viditi sì a voghju. Ùn socu micca stu barbutu grassu è grisgiu. Mi trasformu. Un ghjornu possu essa un briaconu chì seguita i belli donni, un altru un tippu chì faci un AVC davanti à una scola, à mezu à i zitelli, stuppendu u sangui. Chì risata ! Una volta, socu divintatu Prisidenti di i Stati Uniti, è mi socu pighjatu una balla. Aghju salvatu à Hitler zitellu quandu s’annicaia. Ma i so arrori ùn ani ghjuvatu à nulla. Cuntinuieti sempri i vosci cunnarii.

Oghji fistighjeti Natali à partasi di Nuvembri. Hè a sucità di cunsumu, si dici cusì. Ma quandu a diti, è chì vò a criticheti, feti quantunqua à spula. Sì eru un umanu, murtali cum’è voi, è micca riccu, ùn spindariu micca i me soldi pà cumprà falzi ambrucciati à trè aurò. Un brocciu, dui limoni, zuccaru… Socu un Diu ma ùn possu cambià l’affari tali. Piccatu !

Natali, o Natà ! Ni vuleti nevi ? Eccula ! L’avviò sò lecchi, a vittura ùn pò viaghjà. Seti alegri avà ? I vosci suparmarcati sò bioti ! Patiti a fami. Chì piacè ! A maghjia di Natali ! Ma u troppu stroppia, a vi cacciu.

Vi piacini i fuletti ? M’aghju da sceglia una cità à ghjornu sin’à Natali, è v’ani da piacia a squatra fulittina ! Ani i borsi pieni ! Iè, st’annu, hè Natali pà tutti. Ancu pà i capri sbandati. Campetivi li me cari, chì dopu, sapeti chì sarà par voi.

Ùn n’aveti micca una techja di sti filmacci americani di Natali ? Una mamma cù dui zitelli, sola. Un omu, bellu, riccu, solu dinò. Eiu ùn ni possu più. Stà in casa, hè una prighjò. Chì possu fà cum’è culpacci di Ghjinnaghju… Caccarella pà tutti ? Filicità pà tutti, fora di i pulitichi chì v’ingannarani di ghjalusia ? Ùn aghju tanti puteri hè vera, a filicità ùn possu. Pà a caccarella, ci travaghjaraghju.

Hè ghjà una burla Natali : Ghjustinianu Bieber canta Natali, ficatellu di porchi d’Ucraina, ripasti di famighja, i custumi puzzi, i publicità merzi, l’ingorghi, a to faccia, è tanti altri affari…

A sò ! Aghju da fà creda à i stratarrastri ! Una forma guasgi umana. Una spezia di cazzu à mezu à a fronti, ma sarà l’urganu di a cumunicazioni è di l’amicizia, nulla di sissuali. Mi faraghju passà pà un imbasciadori, bravu. Palisaraghju calchì sicretu di l’universu, di a fisica quantica, di u tempu… Sarani falzi, ben intesu. Pà compia, li faraghju creda ch’ùn m’ani micca rispittatu, è diciaraghju : « Rivinaraghju cù un’ armata ! Bò, un’ armata par voi ùn ci hè bisognu, un vascellu bastarà. »

È fighjularaghju, la ghjenti, i media, i paesi…

Have FUN : Filici Ultimu Natali !



Aucun commentaire:

Enregistrer un commentaire