vendredi 24 juin 2016

Raffaellu Ferrandini è Paulu Sanguinetti, fideli di u Sud



Una cronica di Didier Rey 


Uriginarii di u Capicorsu, Raffaellu Ferrandini (Mursiglia, 23 di sittembri 1833) è Paulu Sanguinetti (Ruglianu, 17 sittembri 1846), ben ch’ùn appartinissini micca à a stessa generazioni, cunniscistini i parcursi guasgi similarii, simbulizendu quisti currenti migratorii è i ligami intratinuti tantu tempu trà a rigioni a più sittintriunali di a Corsica è l’Americhi.

Paulu Sanguinetti ùn era chè un ziteddu d’una duzena d’anni quandi u distinu u buccò à imbarcassi pà i Stati Uniti, dund’iddu ghjunsi in 1859, stabilindusi in Richmond, Virginia. Sbarcatu in a stessa cità, di branu 1860, Raffaellu Ferrandini era iddu ghjà beddu più maturu ; uni pochi d’anni nanzi avia participatu à a Guerra di Crimea (1854-1856) in i ranga di l’armata francesa, è ni vultò ancu dicuratu. Quand’idda schiattò a Guerra di Secessioni (1861-1865), di branu 1861, è chì a Virginia righjunsi a Cunfederazioni, i dui omini s’ingagioni cù i truppi di l’armata sudista. Ferrandini sirvisti à u 2nd Regiment, Virginia State Reserves in a cumpagnia K, mentri chì, malgradu a so ghjuvantù, Paulu Sanguinetti purtò l’uniformu di u 19th Virginia Infantry Regiment, cumpagnia K. Sì Ferrandini, puri cù u so passatu militaru, pari d’essa statu sempri in guarnigioni pà a difesa di Richmond, è quissa duranti a guerra intera, Sanguinetti, inveci, feci campagna è si ritruvò ancu in Gettysburg. In u mentri di ‘ssi ghjurnati tirribuli di luddu 1863, ùn sapia micca chì, sutt’à i culori di l’Unioni, si truvaia u so cumpatriottu Mauriziu Grimaldi.

Dopu à a guerra, Ferrandini si stallò à modu difinitivu in Richmond è si lanciò prestu in u cumerciu, aprindu, ghjà à a fini 1865, un magazenu di pirrucchi è cappeddi, com’idda a ci impara una publicità sciuta in The Daily Dispatch di u 28 dicembri. Muscendusi particularmenti astutu, feci fruttificà u so affari, è acquistò di luddu 1872 u Monticello Hotel, annant’à Broad Street, pà un costu di 15 500 $. 

Intrapresi i travadda impurtanti in vista di trasfurmà u piantarrenu è apra i cumerci. U Monticello duvintò un di i loca d’appuntamentu i più stimati da a bedda sucità di Richmond, è The Times Dispatch di u 29 di nuvembri 1903 ci ramintaia ch’iddu custituia u locu ideali pà i dances and private entertainments. Bramosu d’allargà i so attività è intratinindu una currispundenza siguitata cù i so parenti isulani, Ferrandini i sullicitò in u scopu di riceva uni pochi di calzi di vigna, dendu prestu nascita à un vignetu in tarra americana. Ma a so riescita si traducisti dinò in u duminiu civicu. In 1880, à l’occasioni di u centanaghju di a battaglia di Yorktown chì sucillò l’indipindenza di i Stati Uniti, ebbi u privileghju d’essa numinatu da a cità pà accodda u Generali Boulanger è a delegazioni francesa invitata à i fistività. Raffaellu Ferrandini si spinsi in Richmond l’8 di frivaghju 1920 ; fù l’occasioni pà u Richmond Times di u 9 di frivaghju di ramintà chì Mr Ferrandini is survived by three children. Mrs A.M. Blankenship, Mrs J.A. Birchett and Frank Ferrandini, all of Richmond; five grandchildren and one great-granchild. Prova di l’impurtanza di u ziteddu di Mursiglia in a sucità di l’anziana capitali cunfederata u Richmond Times-Dispatch di u 2 di ghjinnaghju 1921 mintuvaia a so morti com’è un fattu di primura pà l’annu scursu. Puri a vita ùn era micca sempri stata dulci pà Raffaellu Ferrandini postu chì, in 1889, avia persu unu di i so bisfiddoli, Raphaël F. Ferrandini, in cundizioni d’un’ atrucità assuluta : l’Alexandria Gazette di u 15 di ghjunghju 1889 signalaia a morti par via d’un’ annighera, in Baltimore, di u ziteddu d’8 anni, surpatu da una surtita di cundottu mentri ch’iddu ghjucaia cù i cumpagni. 

À a fin’ di u cunflittu, ancu puri senza avè a spirienza militara di Ferrandini, Paulu Sanguinetti, dopu calchì esitazioni è un ritornu curtu curtu in Corsica, scelsi quantunca d’ingagiassi cù l’armata americana è ci feci una carriera rimarchevuli, ghjunghjindu sin’à u gradu di generali. Stabilitu in Montgomery, in Alabamà, firmò puri fideli à i so ingagiamenti di ghjuvantù è quissa di parichji maneri : prima cù un impegnu forti cù l’urganizazioni di l’anziani cumbattanti cunfederati, participendu di manera rigulari à i cirimonia di ricunciliazioni di Gettysburg. Dopu, in 1908, mentri ch’ùn era sempri chè culineddu, intantu chè membru di u Cumitatu di sustegnu finanzieri pà l’erezzioni, in Montgomery, d’una statua didicata à u Generali Robert E. Lee, l’eroi tutelariu di u Sud. Infini, arriunindu una ducumintazioni imprissiunanti cuncirnendu l’United Confederate Veterans records, 1889-1933 chì cumprindia currispundenzi, listi di membri, documenti stampati o finanzieri, ecc., oghji cunsirvata à l’Alabama Department of Archives and History.

Ma u Ruglianincu era dinò un passiunatu di baseball è un ritrattu di 1937, postu à l’Archivii di l’Alabamà, u moscia in traccia di rinvià una badda in ghjocu dipoi i tribuni di u stadu di u Crampton Bowl in Montgomery. A so vita privata ùn cumpurtò micca, à ciò chì pari, i stessi moti chè a so vita publica, maritatu à Marie Shelley, ebbi una fiddola chjamata Stella chì nascisti in 1884.

Versu a fin’ di a so vita, intesi u bisognu di riveda un’ ultima volta a so patria d’origini. U 14 di maghju 1935, à l’ità d’88 anni, s’imbarcò annant’à u Champlain, à distinazioni di u Havre, po’ righjunsi à Ruglianu indu l’aspittaiani certi femini di i so nipoti ch’ùn lu cunniscìani chè di manera epistularia, prova quantunca chì tutti i ligami ùn erani rutti cù a so famidda. ‘Ssu piligrinaghju in Corsica ùn si passò micca senza pruducia calchì trostu, è si ritrova a so traccia in una parti di a stampa d’Algeria ; cussì, L’Avenir de Soukh Ahras di u 18 d’austu lampaia quissu titulu : « Le général Sanguinetti 60 ans après ! ». Paulu Sanguinetti morsi guasgi centanaghju, u 24 di nuvembri 1940, in Montgomery, accant’à a so fiddola è u so ghjennaru Paul Ryan.


2 commentaires:

  1. Prublemi di linguistica... Leghja "Sud" à a francesa in u titulu. Vuliamu metta l'italichi ma a funzioni ùn viaghja pà l'intitulati, ci ni scusemu.

    RépondreSupprimer
  2. È "Süd" ci veni mali à scrivalu. O tantu chè Meziornu o Miridianu ch'ùn ci parini micca naturali pà a tematica di u testu

    RépondreSupprimer