samedi 24 février 2018

Ganja in my brain

Un testu di Filippu Guerrini 


Aiacciu l’ottu di maghju di lu 2028. U populu ghjè accatamassatu daretu à i catari fatti in legnu di castagnu per festighjà l’indipendenza di a Corsica. Sò millaie è millaie à aspettà u stolu di l’eletti di u novu guvernamentu independente. Un’ armata di miliziani bardanu sta mansa di persone sottumesse è impaurite. Ecculi quì chì sfilanu, vestuti da treillis à l’usu cubanu, i figlioli di a resistenza corsa, u surrisu in bocca, fendu mottu à dritta è à manca sottu à l’evvive furzate di e ghjente. Un cantu sbocca da a sonò soprapudente prevista per l’occasione : « Sò elli » di l’Arcusgi ripigliatu da tutti à voce spenta. Daretu à u Presidente è i ministri, i ghjucadori di u Sporting Club Bastiais, in tenuta turchina, duvintata frattempu squadra naziunale, i capi d’imprese, i giganti di a grande distribuzione, a maffia nustrale, Ghjuventù Independentista, i culturali di serviziu è in coda di manifestazione tutti l’anziani prighjuneri pulitichi a faccia piatta vestuti da clandestini. A bandera stampata di testa mora schiaffiteghja à lu ventu in sta ghjurnata d’allegria « populare » filmata da Via Stella, oramai televisiò di statu. 

In fondu à u corsu Petru Rocca (Anzianu corsu Napuliò) una tribuna hè stata alzata incù i pezzi d’armatura in ferru ricuperati in Furiani è saldati dopu à a strage. « Tamanta strada », si marmuttuleghja à sottu voce, u Presidente in tenuta militare, fumendusi unu speziu di sigaru tamantu chì facia pinsà à un’ tizzone smisuratu. U discorsu era prontu è bè. Ci vulia avale à cunvince u populu di a nova andatura ecunomica di u paese. Chì a situazione di l’Isula di Corsica dopu à ott’anni d’autonomia, andava à caternu. Eppuru l’avia fatta è bè Lenine incù a so « NEP » (Nouvelle Economie Politique). 

A cooficialità ghjera stata un scumpientu maiò per via di i bisbigli trà i partisgiani accaniti per a supranità di a lingua suttanaccia è l’Università di Corsica chì vulia impone l’idea d’un’ academia corsa per uniformizà è ufficializà u corsu à prò di a lingua supranaccia ! S’eranu ancu scontri in Vizzavona u 31 di lugliu, a squadra bistrocca di l’aiaccini è i difenditori di a lingua in crusca, per acciaccassi à colpi di talavelli in una mandraga tremenda. È tutti morsinu trè anni dopu à a battaglia, senza chì u prughjettu di Pianificazione Linguistica fussi messu in ballu. Face chì u statu di a lingua s’era impeghjuritu. Ma l’avianu previstu parechji linguisti è ancu Jean-François Bernardini, chì a coofficialità ùn bastava à arregulà i prublema di a perdita di a lingua. 

Invece u sviluppu ecunomicu era statu à l’iniziu una bella riescita. L’Atrium, Leclerc, Leroy Merlin, Géant Casino, Utile, s’eranu impiuti e stacche à buzeffa. Micca l’impiecati ne e venditrice è nemmancu u persunale di mantenimentu chì eranu pacati à l’elastica, ma i patroni chì ghjeranu avale i maestri di l’ecunumia, di a finanza è dunque di u putere puliticu. I trasporti maritimi è aeriani, u trattamentu di i frazi, u bastimentu, a stampa, in manu à sti maffiosi speculatori, avianu stirpatu u cummerciu di prussimità è l’inseme di l’artisgianatu nustrale. E cità s’eranu viutate di i so magazini è di a so ghjente à prò di i Centri Cummerciali. Ma eramu frà noi, frà Corsi è omu sà chì u sangue stringhje. È c’era un paese da fà ! Fattu si stà chì pian pianinu, per via di a cuncurrenza è di l’intaressi chì criscianu, anu cumminciatu à manghjassi u fegatu trà di elli. I morti di i dui campi si cuntavanu à pallate. Fà è fà chì l’Atrium s’era trasfurmatu in Funerarium. È l’ecunumia corsa da sprufundà ! 

L’agricultura è l’allevu ùn bastavanu à nutrisce à tutti ? Ghjera quantunque unu di i puntelli maiò da custruisce un’ avvene corsu ? Iè ma postu chì tutti i strangeri è soprattutu a cummunità magrebina, eranu stati invitati à raghjunghje u so paese d’origine, chì di a cummunità di destinu ùn si ne sintia più parlà, ci era statu una mancanza tremenda di bracci per e racolte di l’agrumi, e vindemie, e muntagnere, e tumbere, e diraschere, ecc… A maiò parte di a giuventù corsa di sti travagli penibuli è imbruttaghjoli ùn l’averebbe fatti mancu per more. Noi i Corsi fà u travagliu di l’Arabi ! Mancu à pinsalla. Avianu tutti custruitu baracconi à bordu di mare, residenze di lussu per turisti carchi à soldi, palazzi è usterie, chì avale u litturale s’assimigliava à quellu di l’Isule Baleare o à a Costa d’Azurru incù e so belle « Marinà ». 

Dunque l’agricultura corsa ghjera in bancarotta. È i centu cinquanta milla abitanti di l’Isula, tutti corsi di core è di sangue, ùn bastavanu à fà campà un’ecunumia agricula. U cynips s’avia manghjatu a castagniccia, l’ape eranu state sterminate per colpa di a polluzione è di e sustenze chimiche, un veru scumpientu ! 

È a cultura mi diciarete ? Custì dinù u pocu chì firmava si n’era struttu in quattru è trè sette. U guvernu avia sceltu una cantarina corsa di nomina cum’è ministra di a cultura. Funu tandu pruibiti tutti i gruppi di rock, di metal, di jazz, di blues, i cantadori d’Operà, di gospel, di varietà francese, Théâtre Alibi, Théâtre point, La Salicorne ecc... Inquantu à a literatura tutti l’autori chì scrivianu in francese sò stati esiliati nant’à l’Isula di Monte Cristu ! Face chì un pugnu d’artisti chì ùn s’eranu scurdati di a filetta, sò firmati. Ma custì dinò e ghjalusie, l’attichju di a frasca, e storie di culu, l’invidia di gloria, u montaseghismu, anu fattu di manera chì per a ministra, à mumentu datu, ùn c’era più ch’è una suluzione di pettu à stu fiascu addisperatu : u sucidu. S’era appiccata, a corcia, à un ancinu cum’è un figatellu ! 

U guvernu ghjunghje infine à a tribuna. U populu burbutuleghja, dilusu è bè, u slogan di u Fronte : « À populu fattu bisogna à marchjà ! » U presidente s’avvicina da u microfonu. Tutti l’astri posanu nant’à e sedie stallate à posta. Fighjula u so populu : omi, donne è zitelli sò smagrite, basi famiti. A fiara di a Vittoria hè sminuita da veru. Visi chjusi è tristi. A depressione cullettiva minaccia. Avale, ci vulia à fà nasce una sperenza nova. Si schjarisce a voce u capu di u guvernu pò principia à parlà : 

Ti salutu populu corsu arrittu, arditu è fieru ! Sempre daretu à noi, à sustene l’azzione di i to capimachja independentisti ! Oghje pò vi ne serete avvisti chì a situazione di u nostru paese hè pessima. A cuncurenza internaziunale, u blocus di l’Auropa imperialista, a scunfita di i nostri prughjetti, ci anu purtatu à a ruvina. Ma, oghje, a soluzione per esce di sta trappula è rilancià a nostra ecunumia l’aghju trova ! U guvernu hà da mette in ballu un pianu d’agricultura verde è allegra chjamatu : « u surrisu in bocca per tutti » ! Averete capitu, vogliu parlà di u cannabis ! Piantemu secondu à l’usu di a Califurnia, di u Coloradò è ancu di u Dakota, u statu u più muralistu è puritanu di i States, u Cannabis à usu medicale è di piacere ! È cum’ella dicia una vichjetta di u Dakota : sè l’affare hè accadutu quì, si puderia passà « anywhere in the word. » « Cannabis for Corsica » eccu u nostru scopu ! U Cannabis serà a leva di l’ecunumia isulana. Erba nustrale chì s’assumiglia puru à a filetta. A Corsica serà a prima isula d’Auropa à legalizà a marijuana. Da Capi corsu à Bunifaziu piantemu senza tricà l’erba di u benistà. D’altronde, a Francia culunialista ghjè unu di i soli soli paesi in u mondu incù a Russia è a Curea di u Nordu à cunsiderà cum’è fora di legge a marijuana. Ùn vi parleraghju micca di i benefizii di u cannabis : face cresce a percezzione, a cuncentrazione, cura a depressione, u cancaru, l’epilepsia, in infusione cura ancu e malatie di i pulmoni.… Ma ùn hè micca solu quessa. Ghjè un « business » estimatu à 5 milliardi di dollari secondu u cabinettu Arcview. U Haschich, a vi dicu eu, hè a richezza di u mondu. Aghju dunque da fà una pruposta di legge per autorizà l’usu di u cannabis in l’isula sana. Un scagnu di studii hà ancu cuntatu tutte e razze di piante. L’importi riscutati da u statu ghjuveranu à finanzà e custruzzione, à rinfurzà u persunale in i stabilimenti sculari è in l’uspitali di u nostru paese. Per fà campà è sviluppà stu cumerciu avemu da creà più di quindeci mille impieghi diretti : pruduttori vinditori, ecc… è centinaghji d’impieghi indutti : fabricanti di serre, elettricisti, persunale di mantenimentu, chimisti, erburisti… 

Dumandu dunque à tutti i Corsi di cunsumà, almenu, una decina di tizzoni di cannabis à ghjornu ! Di lascià cresce i so capelli è d’intriccialli per fà ne dreadlocks ! Corsi tutti rastafari ! Contr’à a viulenza ! Per a pace, l’amore è a spartera, a Corsica è a Giamaica seranu isule surelle ! 

Per compie l’innu corsu serà oramai a canzona di Bob Marley « Ganja in my brain ». U reggae rimpiazzerà a paghjella ! And now, brothers and sisters cantemula tutti inseme! (I suldati di u populu distribuiscenu e parulle di a canzone è sciaccanu in bocca à ognunu un tizzone d’erba. L’ufficiali s’arrizzanu è accendenu un furganu tamantu) 

È canta u populu corsu: 

“Ganja in meditation, ganja in my brain 
Ganja will take away my stress and pain 
Ganja in meditation, ganja in my brain 
Marijuana take away my stress and pain” 

Un nivulu di “beuh” copre avale u celu isulanu infine assirinatu… 

Aucun commentaire:

Enregistrer un commentaire